عادا نادما بقلم سولية نصار
حسيت راسي بتغلي... أنا مبحبش ياسر ده ولا هو بيحبني من وقت ما اتجوزت شيماء... أنا عارف أنه كان بيحبها من زمان بس متجرأش يعترفلها
الإنسان ده بيعمل ايه هنا
زعقت... فقامت شيماء وقالت بعصبية
وأنت مالك اصلا... وايه اللي جابك هنا.
جاية أشوف مراتي اللي قاعدة مع واحد غريب
زعقت
مراتك مين يا بني آدم أنت احنا اتطلقنا فوق! يعني من يوم ورايح ملكش دعوة بيا.... ويكون في علمك بس تخلص عدتي هتجوز وهبقي اعزمك علي فرحي.
مستحيل تبقي لحد غيري انتي مراتي
احنا اتطلقنا بقولك!
شديتها وشليتها فوق كتفي زي شوال البطاطس وقولت
وأنا رديتك!
نزلني يا بني آدم انت بقولك نزلني
كانت بتصرخ وهي بتضربني علي ضهري جامد بس مرضتش انزلها... كنت عارف اللي بعمله غلط وسخافة بس أنا مقدرش اخسرها.... وقفت لما لقيت أبو شيماء قدامي
نزلت شيماء وأنا حاسس إني مكسوف... بس خبيت كسوفي وقولت
وكمان ميصحش يا عمي أجي والاقي مراتي قاعدة مع راجل غريب.
بصلي وهو متضايق وقال
ياسر مش غريب يا استاذ مازن... ياسر ابن عمها وفي مقام اخوها حاليا أنت اللي غريب عشان طلقتها
وأنا رديتها
اتوترت وأنا برد
هي اللي طلبت الطلاق لكن أنا بحبها وعايزها
طلبت الطلاق لما لقيتك رميتها من غير تفكير وروحت اتجوزت واحدة تاني كنت بشوف بنتي بتدبل كل يوم بسببك وحاولت كذا مرة اتدخل بس هي رفضت... اديتك بدل الفرصة ألف لكن مفيش فايدة.... بنتي حبتك يا مازن وأنت معملتش حاجة إلا أنك طفتها... جرحتها وبكتها وجيت تقولها بكل برود أنت ومراتك أنك هتتجوز عليها... قولي هترجعلك علي أساس
أنا ندمان بجد
للأسف يا مازن الندم مش كفاية... مش هيصلح قلبها اللي اتكسر.... من الآخر يا مازن شيماء بس اللي هتقرر لو عايزة ترجع ولا لا
بصيت لشيماء بحزن وقولت
شيماء اديني فرصة تانية ابوس ايديكي.... لو عايزاني اطلقها هطلقها.
أنا ميرضنيش أحرق قلب واحدة ست زيي يا مازن... مقدرش اشوفها بتتكسر وابني سعادتي علي سعادتها... طلقني يا مازن وارجع لمراتك متكسرهاش زيي حرام عليك بنات الناس مش لعبة في ايديك.
للأسف مقدرش طلقني واعتقني.
سكت وانا حاسس نفسي هنهار... معقول بجد خسرتها بالبساطة دي.... قد ايه الإنسان غبي مكنتش حاسس بقيمتها لما كانت بين ايديا بس لما راحت ھموت عليها.
بصلي حمايا وقال
المرة دي هنروح للمأذون عشان تتطلقوا!
وبكده اتكتبت نهاية قصتي مع شيماء.... شيماء طلعت من حياتي للأبد.... بعد ما خلصت عدتها عرفت أنها سافرت لعمتها اللي عايشة برة وأنا بقيت مع منة وكملت معاها وخلفت كمان.... صحيح مكنتش مبسوط بس كان ماشي حالي.... شيماء مكانتش بتروح من بالي بس عادي بكرة أنسي...
شيماء!
ابتسمت وجات سلمت عليا
إزيك يا مازن اخبارك ايه.
أنا كويس الحمد لله انتي بتعملي ايه هنا.
قرب الراجل مننا فراحت شيماء مسكت ايده وقالت
اعرفك يا مازن ده مراد جوزي اتعرفت عليه في دبي بما روحت عند عمتي وده تامر ابني....
ويا مراد ده مازن اللي حكيتلك عنه.
أبتسم مراد وسلم عليا بأدب وقال
تشرفنا
الشرف ليا يا استاذ مراد.
قربت شيماء من بنتي وقالت
السكر
دي تبقي بنتك صح.
آه دي شيماء الصغيرة
بصت لجوزها بتوتر بس ابتسمت وهي بتقول
اومال فين منة
منة حامل في الشهر التامن مبتقدرش تطلع كتير
مسكت ايد جوزها وقالت
ابقي سلملي عليها يا مازن احنا مضطرين نمشي دلوقتي.
ومشيت شيماء والأمل اللي في قلبي انتهي... شيماء ضاعت للأبد والأفضل ليا إني مضيعش وقتي وأنا مستنيها.... بس تجربتي مع شيماء علمتني أن أقدر الإنسان اللي معايا قبل ما يضيع مني.... عشان الندم احيانا مش بيفيد
لسه بتحبيه يا شيماء!
هتصدقني لو قولتلك أن حبي ليه انتهي يوم ما اتجوز غيري!
مسكت ايده وقالت
وحبي ليك ابتدي من أول ما شوفتك... جميل أن الإنسان يحب ويتحب... جميل أن حبنا مش من طرف واحد.
باس ايديها وقال
وهفضل أحبك دايما.
وأنا كمان.
تمت
عاد نادما
سولييه نصار
